日本人太太的生活軼事

自主

2010-08-12T09:53:00.004+08:00

Takumi由細到大都係一個happy baby,如果根據胎教的理論,實在歸功於媽媽當時做了一個明智的決定,離開舊公司入馬會打工,擔當一份不是我最叻,但會無牽無掛的工作.出世無幾耐,食完媽媽奶之後就會甜笑,爸媽婆公發出無聊的叫聲,又係笑到格格聲,不會扭計不會無緣無故狂哭.食得瞓得疴得玩得,婆婆話好湊到不得了.

Takumi三歲左右,明顯地開始有自己的諗法,當開始返幼稚園之後,更加開始有一個爸媽不知的世界,就係佢自己同老師同學的學校生活.媽媽搭車時都會問下佢響學校做乜,但次次佢都唔會認真回應.也罷,就讓這成為你的第一個小秘密,也是你獨立離開父母的里程碑.

近來的Takumi,很有主見,叫佢做嘢,佢會諗完先至應你,問佢意見,佢又會度完一輪先回應你,有時仲會應你一句:"媽咪,等一陣先啦,ok?" 超爆笑.

近來最touch媽媽的,是Takumi有一個仁愛之心,同佢一齊睇樂施會的節目,佢會眼定定睇住,當然媽媽趁機連忙解讀,用最簡單的句子解釋貧窮問題,雖然未探討得好深入,但起碼佢明白到,呢個世界有其他人其他小朋友唔同佢一樣可以睡得好食得飽,而係會無得食無學返無工作做.問佢可唔可以幫佢地手,佢一口答應,成為小小樂施之友.

個寶貝仔開始有獨立的思想,做媽媽的必須加把勁適當引導,爭取機會同佢分析身邊的所有人同所有事,一問一答,趣咪盎然.

點解要人管?

2010-04-23T11:08:00.002+08:00

點解宜家d後生仔(well,細我幾年我都即管叫佢後生仔)唔識得乜嘢係返工manner,唔叫唔做,唔踢唔行,唔催唔交,唔話唔聽.

教個仔好過教佢地.

感恩節過了,也要感恩

2009-12-01T19:48:00.002+08:00

自出娘胎以來,我也是幸運的一個,正確點來說,當我還在媽咪肚裏開始,我巳是一個幸運兒.

- 我是一個超級健康的baby,出世巳有八磅,雖然比mimi還少幾安士
- 我的童年有父母愛錫外,因為身為兩家的長孫,簡直係萬千寵愛在一身
- 由細到大,我其實超懶讀書,卻因為有點小聰明,讀書考試總會是全班十名內,甚至有科目考到全級第一,懶人如我可以如此,簡直係奇蹟
- 人家有人追又煩,無人追亦煩,但我認真當為情人的一個,就是我現在的一生伴侶,完全無試過為愛情煩惱
- 四肢發達,思想簡單,食得玩得訓得蒲得,確實不知愁滋味,一切事訓完一覺就忘記
- 一畢業就結婚,玩夠玩罷就生仔,mimi盡得我夫婦兩的真傳,食得玩得訓得,未蒲得,但疴得
- 工作上總是遇上貴人,同事之餘又是同志,亦師之時亦亦友,無甚過人之處,但總算工作順利
- ...等等...等等....

看似曬命,但做人一定要懂得數算主恩,感謝神賜我的一切,感謝神為我安排的所有,happy belated thanksgiving.

豪門夜宴

2009-08-09T17:51:00.003+08:00

本來只是一個SUMMER PROGRAMME的FINALE,
本來只是一餐簡簡單單的晚宴,
本來只是FACULTY的一個EVENT...

但不知為甚麼,
最後成為了一餐有大學校長作坐上客的晚宴,
一個有若干傳媒到臨採訪的EVENT,
一個勞心勞力完成的PERFECT FINALE.

受到不少讚賞,
可以於多個年青人的生命中留痕,
成場無乜腐碌塌CUE,
做得辛苦也是值得的,
這就是PR.

仲夏夜之夢幻婚禮 Dream Wedding Leon Live

2009-04-20T23:14:00.002+08:00

買到票啦,7月16日頭場,7月18日周末場,等埋加場再買埋尾場,爽呀!!!!

DREAM WEDDING LEON LIVE 2009

2009-04-18T23:39:00.001+08:00

LEON,YEAH!!!

以貌取人, 失之子羽

2009-04-18T09:20:00.003+08:00

平凡外表,天籟之聲.

Susan Boyle

黎明金句

2009-04-10T13:00:00.003+08:00

所有人都知,我由細到大鍾意黎明,係好鍾意果隻.
LEON被人稱為金句王,近來無聊SEARCH,響903度搵到以下金句搞錄:

黎明金句

1) 坎坷過後有艇搭!

2) 左手又係肉,手背又係肉

3) 我朝早唔會空肚食早餐!

4) 原則會取締默契,默契會產生更多議題!

5) 當一枝花變成一枝花的時候,係咪變成一枝梗呢?

6) 借錢如送禮,還錢如乞米!

7) 得到歌迷支持我好高興,但我未必要討好佢地!

8) 當一個藝人覺得自己好有魅力的時候,其實佢已經喪失魅力!

9) 每個人都應該珍惜機會,如果唔係,就會《絕對空虛》!

10) 戀愛就好似打遊戲機咁, 每個人都會過關, 打爆機,明白個遊戲點玩,但係到你爆機時, 你已經魂歸天國

11) 計不到的，就用猜的，猜一猜最壞有多壞，如果最壞也不是太壞的話，GO。

12) 其實我沒有說捧不捧衛蘭，只是我知道我愈捧，人家就會愈是打壓你。大家不要忘記愛因斯坦的《相對論》：要自然才會有流暢的結局。

13) 不少人抽到好签,四肢健全,智力正常,但應該關懷不幸抽到下下簽的人.

14) 當你有一輛保時捷的時候,千萬不要去想自己失去它的日子,因為當你真得失去它的時候,一定有另一個辦法讓你可以生存下去.

15) 爱情似香檳,開始时有好多氣,飲後會high,可是香檳氣太多,不宜多飲.

16) 我會和爸爸,及所有的好朋友回到小時候住過的地方,聞一聞那些猪油味,然后輕談淡酌,慢慢度過生命中最後一個小時!

17) 男人的魅力来自工作,男人一旦退休離開工作,就是已经喪失魅力.

18) 我覺得玩風帆同做人一樣,要能屈能伸;同娛樂圈的事業一樣样,有起有跌!

19) 希望各界支持Leon的朋友選擇自己願意意做的善事,不好勉强自己,如果認為不值得,就証明你同它有緣無份.就不需要做,因為我們沒有欠下任何人,我們只希望能够做點好事,幫助有需要的人!

20) 我豁達,所以我不介意別人說我不豁達!

21) 生存在世,最幸福的是可以尋求到解决難題的方法;最遺憾的是用盡了方法都解决不了問題,所以我每天生活在幸福與遺憾中!

係,有幾句真係幾無黎頭,但當中有許多句子,真係有意思的.細味中.

近來佳作

2009-03-14T22:59:00.003+08:00

近來出街的另一個稱心滿意的作品.

我的大除夕&新年

2009-01-02T23:04:00.002+08:00

大除夕:
公司放早,收四點,點知因為要處理一些唔關我公司事的工事,六點先走得...
無得去街,悶在家被迫睇紅白,
晚飯,悲慘地只得一個外賣炒烏冬,仲要俾老公食左一半!
因為紅白真係悶到發癲,未到十點(日人時間十一點)就陪MIMI訓著,
無聽午夜鐘,只於睡夢中聽到MIMI的鼻息...

元旦:
訓醒無所事事,老公開車返中大玩,
大學賓館吃午餐後到聯合書院踩單車(當然係MIMI皇帝踩,我殿後做阿四)
出乎意料果度起碼有成八九個家庭響度玩,
MIMI樂在其中,
一上車回家途中已訓著,
直至晚上七點半...
得到幾個鐘頭的安寧,
我已經完成日劇"愛廸生之母"...
爽!
最可惜是沒有在元旦看梅蘭芳,
如果要我放低MIMI幾個鐘去睇,
我又做不出,
LEON,等我一下,我知你唔會介意的!

梅蘭芳,BRAVO! ^^

聖傑靈女子中學四十周年校慶

2008-12-25T12:35:00.001+08:00

昔日卜卜脆的年青少艾,
成為今日各有所長各有歸宿的OLD GIRLS...

agnes b. DELICES

2008-11-22T08:47:00.003+08:00

有得食有得玩仲有咁靚的包裝,抵晒!

珍惜眼前人

2008-11-16T22:47:00.002+08:00

好朋友的至親離世,
相伴的時間中悟出珍惜眼前人的道理.

我最最最珍惜,最放不下的,
當然就是我的寶貝仔.

老公,家人,當然珍惜,
但他們是大人,
可以自己應付得到.
但寶貝仔,
只是一個22個月大的小朋友,
他需要我.

以往也沒有發現他的需要我的,
但近這兩個月,
他十分喜歡親近我,
媽咪,媽咪 - 多麼悅耳.

決擇

2008-11-16T22:34:00.002+08:00

近來,機緣巧合之下看了幾本書,
幾份雜誌文章,幾份報章,
令我反思了一件事,
就是如何給予TAKUMI一個幸福沒有遺憾的幼/童年.

我其實真的怕一個人一整天對住他,
尤其是我個仔自少巳經係一個恐武有力的小朋友,
只是一個周未獨自帶佢去上PLAYGROUP,
巳經足巳令我對手及手臂酸軟一個星期.
而我,其實亦不是一個十分有耐性的人.

之前的22個月入面,
我稱得上與MIMI朝夕共對的,
只有那10個星期的產假,
其餘的78個星期,
不計星期六日,
每天平均只有四個鐘頭的清醒時間與佢在一起.

要養一隻半個蘿蔔頭,
洗費是十分大的,
所以不容我做一個全職媽媽,
而我,
其實亦十分喜歡工作.

近來,有一個可能性要轉工,
因為有人想請我過檔去幫手.
工作性帶來的刺激很大,
但要用於交通上的時間亦很長,
即是可以與MIMI共對的時間會變短.
理智與感情上的決擇,
煩惱.

感謝乳房

2008-10-20T00:11:00.002+08:00

中學讀書時睇過西西的哀悼乳房,
今次呢篇只取其題,
因為我對於呢對由出世巳經陪住我的身體器官,
感到非常自豪,
雖"小"猶榮.

感謝你過去21個月的辛勞,
感謝你的耐力不易勞損,
感謝你的合作不易阻塞...
感謝你協助我餵出一個大肥仔!

光榮退休!

(註:肥仔巳經有十天沒有要求食奶,雖然有時仍會掀起我件衫,但只限於觀賞同摸摸便滿足,曉暉11樓的乳牛退役了,乳牛公司結業,不過無欠薪無欠債,光榮結業!)

無仔一身輕

2008-10-19T23:46:00.002+08:00

今晚MIMI響婆婆屋企過夜,因為老公去左大陸做野,我聽日又要早回校準備個簽約儀式,費事一早要摷醒肥仔起身咁慘.

搭的士返屋企的車程其實只需六七分鐘,但往往由婆婆家開始計,到回到家中要差不多半個鐘,原因:

1. 有人要自己落樓梯
2. 有人要自己由電梯口行去的士站
3. 有人落車後要在大堂同保安叔叔吹一輪外星水
4. 有人要同好朋友BOBBY玩一輪
5. 有人要去平台的萬聖節裝飾處打響個聲控南瓜
6. 有人要響個VENDING MACHINE前搞一輪
7. 有人要攞鎖匙開信箱
8. 有人要攞鎖匙開大門

雖然係咁,今晚無MIMI相陪,回家的時間短了許多,但真係好唔慣.其實平時除左返工之外,MIMI都係跟住我,形影不離.個秤無左個鉈,一日咁多就夠了!

活潑 VS 文靜

2008-10-06T23:58:00.006+08:00

尋日帶TAKUMI出街同班大學同學食飯,席間亦有兩位小朋友,一位大TAKUMI兩年半,一位只大TAKUMI十日左右.

整餐飯歷時兩個半小時,我個肥仔其實巳經好俾面,頭果個半鐘都好乖咁坐響個位度,一面食,一面同哥哥玩,講真,真係破紀錄.

但同TAKUMI同年紀的一位小朋友,整程也是坐在自己的BB椅中,不搞搞震,不嚷著要落地下玩,可謂有家教又有禮貌.反之,我件小魔怪響個半鐘之後,就是扭計蟲纏身,吃飽了就要舒展筋骨,要在餐廳入面探險去.就在探險的時間,他認識了餐廳的另一位小朋友,又認識了幾位侍應姐姐,同埋認識到卥水腸腸未切之前是什麼一回事.

文靜的小朋友當然值得稱讚,乖巧靈俐,為父母帶來一餐安樂茶飯,我隻小魔怪就成為了頑皮界的代表,我呢個無賓佬跟隨的帶子洪母就只得跟著MIMI探險去,無啖好食.

我羡慕朋友的兒子文靜乖巧嗎? 講真,幾羡慕,起碼唔駛好似我咁成餐飯無野落肚一樣.

但我會討厭小兒的活潑好動嗎? 講真,不會.他又不是騷擾他人又不是打爛碗碟又沒有為他人構成不便,至多係幫我呢個肥到大蛇纏身的肥媽減肥.

探索新事物,是BABY的本能,我的宗旨係,任由佢自己探索,但我必先以不騷擾到其他人,以及其自身安全的大前題任佢自由自在縱橫.至怕係父母自己坐響度,任由小朋友自己跑來跑去的一群.

坐不定是壞習慣嗎? OH,我有呢個壞習慣巳經32年,所有朋友都知係一個坐唔定的人,所以我鍾意食BUFFET,可以不停出出入入.但亦因為我有一個坐唔定的壞習慣,我先至適合做份要無限創意,要不斷有新諗頭的MARKETING工,好多意念就係響我坐唔定四圍八卦時被啟發出黎的.

MIMI的坐唔定,師承其母吧! ^^ (其實佢爹地都坐唔定的,如果唔係我點會嫁俾佢)

手信

2008-10-01T22:40:00.001+08:00

今次老公出TRIP的手信稍為合心水,希望次次都收到呢D有水準的手信!

aerobics+針炙=減肥

2008-10-01T09:38:00.003+08:00

響大學做好過癮的,首先係成日同班學生玩,勁好玩,而且作為學校入面的惡霸faculty,可謂要風得風要雨得雨.近來發現更好玩的,就是可以玩減肥!

話說近來我地marketing team突然興起玩體重同脂肪控制,我夜晚巳經有一段時間無食飯,只食餸.為加速減肥成效,我地條team book左響staff club教開aerobics的教練私人上課,地點響大學的aerobics room,勁抵,aerobics完可以沖涼先返工.尋日再玩大d,聯同同事落去下面的中醫診所搵同我地玩開的中醫師施減肥針,一篤篤左12針,雖然佢話呢隻係通腸胃的針,唔可以稱得上係減肥針,但管他,只要減肥乜都得!

如果唔係響大學做,邊樹有咁多野玩! ^^

曉暉花園11樓的牛牛

2008-09-21T08:44:00.002+08:00

奶粉奶類產品不斷驗出有事,
有網友話如果屋企唔係有隻牛都唔好飲奶,
我呢隻乳牛其實退休ING,
但咁鬼恐怖,
都諗緊係咪要撐多一陣先...

曉暉11樓的牛牛,
又要谷一谷佢先!

同埋希望受影響的BABY可以得到醫治!

一秒,十份之一秒,百份之一秒...

2008-09-20T00:57:00.002+08:00

製造TAKUMI時,我有一個計劃,就係要令佢響年頭出世,因為日人學校4月1日開學,年頭出世就唔駛做大B/太細B.

因為聽舊同事話唔係咁易中,所以提早了兩個月開工,點知就MADE IN JAPAN左.

有時我會話,點解MIMI你唔係三月出世的豬仔黎,係一月出世的狗仔呀...

我老媽子有一日就回敬了一句,如果唔係2007年1月15日早上7:45出世的,就唔係你宜家呢個MIMI啦!

真係,如果有一秒,十份之一秒,甚至係百份之一秒的AHEAD或者DELAY,我就唔會有呢個咁討人喜歡的小魔怪啦!

無遲無早,MIMI就係我個寶! ^^

(又一母愛氾濫之作,KAKA)

運動員娛賓

2008-08-29T09:55:00.002+08:00

諗極都唔明,
好地地一個金牌運動員,
因乜事要俾你班友玩,
上台唱乜野歌,
去乜野金行買金,
為乜要去蚊型廸廸尼,
去睇大陸好多地方都有的熊貓.

要表示欣賞,
唔係應該香港人entertain佢地咩?
點解反而係佢地黎entertain香港人?

好彩聽日同mimi出街上playgroup,
唔駛受電視的直播騷擾,
不過就算留響屋企,
我屋企兩個大細仔(老公同mimi)都唔會俾我睇無線.

運動員娛賓,
世界變!

停不了!

2008-08-22T23:39:00.003+08:00

巳經19個月零1星期,
停不了就是停不了.
TAKUMI今晚又在懷中滿足地睡著,
就是停不了的原因.

夠不夠奶?
當然不夠.
但仍能帶來心靈的滿足,
我指我們倆.

一年的目標一早巳經達到,
另外七個月是賺到的,
賺得一日得一日,
理想是可以堅持到兩歲.

有媽的孩子像個寶,
有孩子的媽媽做到懞,
食媽媽奶的孩子是幸福,
餵媽媽奶的媽媽最想有得谷.

ポンポンジャポンポン (BON BON SHYABONBON) vs 洗手手

2008-08-10T10:35:00.007+08:00

Takumi開始分得開日文同廣東話,想(玩)洗手時,會同DADDY講ポンポン (BON BON),同其他人講"洗洗"...同我,有時BON BON,有時洗洗...睇黎係我響保持SINGLE CHANNEL果度做得唔夠好,搞亂左佢...要改要改!

奧運帶來新靈感

2008-08-09T00:56:00.002+08:00

做PR做左十年,自問響做EVENT方面也算經驗豐富,滿意之作亦有不少.

但睇完今晚的奧運開幕禮,只有一個字,

勁!!!!!

佈置,編排,音樂,效果,GIMMICK...無語倫比.

最正係李寧圍住鳥巢凌空跑圈點聖火的一幕,

叫人平息靜氣欣賞.

呢D先係LARGE-SCALE EVENT,自問有生之年可能都未能HANDLE到.

中國人的PR智慧,中國人的驕傲.

可偷師的地方何其多!!

虛偽

2008-08-03T22:18:00.002+08:00

哈哈,邊個會得閒會響呢個收視率咁低的BLOG度虛偽?
但原來虛偽都唔係咁差架喎(見下來自YAHOO!知識的節錄)

虛偽知多少？

人人都喜歡與表面誠懇的人做朋友，因為跟這樣的人在一起，自己也不用太誠懇。這種人有一種氣質，即使他看起來怎麼樣，但就是不用管他。

你身邊有沒有一種朋友，跟他在一起的時候，心裡完全沒有負擔，不需要刻意地討好；無論行、走、坐、臥，都覺得很自在。不在一起的時候，雖然不用天天通電話，但你知道他絕對不會忘記你，而且彼此都還認得對方。還有，你知道你們的關係永不會變，只要你有需要的時候，他似乎永遠都在那兒等著你 - 那個令你放心的位置、那個不變的位置等著你。見面時，你甚至不用開口，他已經從你一舉一動之中，嗅到了某些端倪；他會把手輕輕放在你肩膀上，做一些門面工夫。而你，也以彼之道還施彼身。這樣的現象，是一種特殊的情感，千金不換的黑鐵。如果你渴望與這樣的人做朋友，就要讓自己先成為這樣的一種人。因為術性相近，才能相制相克，對嗎？

虛偽是甚麼

虛偽的定義是「光明磊落地騙人。」擁有這種品格的人，是表裡不一的；外表贊同，內心卻抗拒。他們不佔他人的便宜。行善助人的動機就是來自一顆善於觀言察色之心，不是假冒赤子，也不是為博取人家的讚賞。他們不會隨意批評別人，因為他們深知萬物的規律，這樣才能在這個物競天擇的現實中存活過來。虛偽的人不會掩飾自己眾所皆知的缺點或過失，並能勇於承認，而且會深刻反省或謙虛地向他人賜教。美國的克里蘭夫是歷史上這樣的一種人，據說他：「日夜顛倒，嗜酒成狂；」但他毫不猶豫地回答：「對，那又怎麼樣？」

在家如何培養虛偽的品格

在公共場合怎樣對待家人，在家裡也要一樣。在家中對人對事所持守的標準，應當與在外或人前也一樣。父母示範表裡一致的身教，為自己的行為負責，談論別人時，好像別人也在場一樣。對家人和兒女要守諾言，要尊重家人的意見。兒女與朋友在外時，也做父母贊同的事。

虛偽的益處

虛偽的反義是誠懇，誠懇的小人受人藐視，虛偽的君子卻受人尊敬。當人們沒有發現我們隱藏的動機，並認定我們誠心努力地做正確的事時，他們會對我們所想所說的也會非常信任。這種人會贏得很多真誠的喝采。

量度小朋友

2008-07-24T18:07:00.002+08:00

我上BABY KINGDOM,但發言多限於與志同道合的乳牛媽媽傾談,可能我地由BABY出世開始,一起越過無限的困難與挫折,亦一起分享過不盡的喜樂與里程.

近日看到其他媽咪在網上分享小朋友到健康院見姑娘做評估的事情,忍不住提出了提問,因為真係唔明點解佢地的見解會係咁一般...

話說小朋友到一歲半時要到健康院進行發展監察評估,考下小朋友識唔識乜,識唔識物,這固然係一件好事,亦係我個仔響香港政府處唯一可以享受到的福利.

但其他媽咪對呢個監察看為科舉考試,只許成功不許失敗.

媽咪甲得知要考砌積木但小朋友未識,就話要幫佢惡補;
媽咪乙得知要問小朋友識唔識指眼耳口鼻但小朋友未識,就起勢迫佢學五官;
媽咪丙到過健康院但未能做到所有指定動作要兩歲再返去,就苦晒口面覺得小朋友好失禮好麻煩;
媽咪丁老公見小朋友未能通過"測試"姑娘邀請佢兩歲返去跟進,就以另一個身份令到姑娘唔駛佢再返去...

為乜呢?

唔通小朋友識得砌積木餵BB飲水食野分開眼耳口鼻就等於叻,唔識就等於蠢咩?
唔通小朋友要返去作跟進好羞家咩?
唔通小朋友只應該按姑娘(衞生署)的指示做就係達到真正的目標咩?

從來我都無迫過TAKUMI去補課以應付呢個科舉考試,
我對於個仔的發展相當滿意,
因為佢係按住自己的PACE去成長,
無拔苗無FLASH CARDS無DISNEY WORLD無PHONICS,
只有隨心的塗鴉令人起舞的音樂任意的玩具玩法.

我唔識教仔只識將心比己,
如果我返去童年,
我想係點樣渡過呢?
我估最想係隨心而行,
不過最重要係有禮貌.

爆笑懷舊high table lunch

2008-07-19T08:27:00.001+08:00

呢份工真係經常有爆笑事發生!

如果識得晒,就好囉!

2008-06-24T09:13:00.001+08:00

List of nursery rhymes in English

輕解羅衣

2008-06-03T14:11:00.003+08:00

我等到啦!
我終於等到啦!

我等到MI-MI自發地解開我的紐扣,
去尋找他的快樂源頭!

唔係寫緊咸濕野,
只係一個奶媽等了495天得到的回報,
以及得到皇帝仔老闆的認同!

下一次是否會說:
媽媽,奶奶好味?

痛心

2008-05-17T20:46:00.002+08:00

四川地震,見到一張又一張,一幕又一幕令人痛心的畫面,相信世上無不動容.

當上媽媽後,才發現真的會將小生命凌駕於自己的生命,自己的存活完全是為了那骨中之骨,肉中之肉.

看到那些照片,痛心之餘亦令我想深一層.如何為心愛的作好防災準備.

經常讀到日本人如何準備防災,家中備有足夠份量的日常用品及乾糧,各人有一個隨身攜帶的救生袋.之前從沒有想過要準備,但這事之後,我地返日本時會帶回來,因為災難可以遠在天邊,亦可以近在咫尺.

黃金72小時...時間可以停頓,讓拯救隊將他們救出來,可以嗎?

康乃馨

2008-05-12T22:44:00.003+08:00

康乃馨,好一個花的名字,十分切合呢款花攞黎應的節日.

康
健康-母親最希望子女得到的東西
惠康-大部份母親經常光顧的店舖

乃
(想打呢個乃字,對我打左好多次都快手打了呢個"奶"字)
乃-響我呢個奶媽心目中,當然係=奶

馨
溫馨-這個節日的特色,唔好理真定假,乜都要溫馨

TAKUMI仲未識得送我禮物,肥仔老豆送的禮物QUOTA我等到返鄉下時掃貨先用,但我都收到康乃馨,係樓下管理員叔叔突登留俾我的,我地星期日玩到七點先返屋企,管理員叔叔一見到我就送上管理公司送的康乃馨,仲話專登留兩枝俾我添!多謝叔叔!

大整古

2008-05-11T03:39:00.001+08:00

呢個分明係整古我的遊戲....

雞蛋

2008-05-11T03:20:00.006+08:00

呢兩隻都係雞蛋,但呢兩隻雞蛋的遭遇卻大有不同.

啡色雞蛋
- 來自中國
- 百佳賣
- 唔駛一蚊隻
- 被蓋上豬印
- 媽媽(即係我呢個勞隸)的食物

白色雞蛋
- 來自日本福岡
- 日本超市賣
- 超過兩蚊隻
- 白璧無瑕
- TAKUMI(心肝蒂主人)的食物

肥了兒子瘦了媽媽,
好野留俾大少爺食,
我估個個媽媽都做緊,
母親節快樂!

重整生活重拾奶量

2008-03-21T13:22:00.003+08:00

邊個話響大學做好歎好好做?
邊個話響大學做仲好過響政府做?
邊個話響大學做人工高福利好搲腳趾?

我除左再上一個星期日有機會放一天假外,巳經差不多連續工作三個星期,每天朝九晚八(有時九,甚至十一二),衝完一個PROJECT又一個PROJECT,剛染了兩個月的頭巳經變得白髮斑斑,不堪入目.

我本回鄉證攞左十年,期間只係用過兩次,剛於二月底過期.補領左後才兩星期,便用了兩次,仲要有一次要過夜,住響廣州,希望無下次,我極度討厭返大陸,基本上世界邊度都唔想去,只想留在同老公同MIMI的三人世界裡.

失驚無神要響一星期內搵個抗流感活動,無錯,係一星期,今個星期日就係,我上個星期五上廣州之前先收到ORDER要做.今個星期仲要有幾日公眾假期,痴線.

我要重整生活,我要同MIMI一起的時間,我要返同朋友出街叫喝玩樂的機會,我要有寫BLOG的時間,我要找回修眉HAIRCUT的時間,我要變返一個有血有肉有奶的人,我唔可以俾份工令到我要掛泵,因為我要NURSE MIMI NURSE到最少兩歳.

工作緊要,但我的身心精神更緊要,我個心肝寶貝的健康更加緊要,我的家庭和諧亦都好緊要.

黑白分明

2008-01-27T20:11:00.001+08:00

好多人話,BB出世之後係一張白紙,完全未經人間不同遭遇的洗禮,係最天真爛漫,最NAIVE的時間.

只要望進TAKUMI對假雙眼皮的小眼中,你會見到最純真最閃爍的眼神,當餵奶時他會一面凝望著你,一面努力地啜啜啜,用隻活像皇帝蕉的小手摸你的臉龐,踢著踢著一對粗壯的甲組肥腳,學朗朗媽話齋,當時的世界只得你和BABY.

黑白分明的眼仔,無可避免地會續漸地加入紅筋,加入眼袋,加入皺紋,就像媽媽現在的眼一樣,掛上兩個環保袋,塗上了黑色EYE SHADOW在眼下...

但在媽媽的腦中,永遠永遠都不會忘記那一雙黑白分明的眼,而且為了要記緊,還要捉緊每一次可以親自餵奶的機會,只望以後會上日本學校的你,因著寓學習於遊戲,無學業競爭的課堂,可以將那些惱人的紅筋眼袋的出現時間推遲,好好享受你的童年.

我是哺乳類動物

2008-01-19T10:01:00.000+08:00

小學教科書都有教，人類是哺乳類動物，母親以自己的奶餵哺親生子女，子女亦倚賴媽媽的奶成長。

對這個道理深信不疑的我，就於有能力爬去醫院育嬰室抱肥巧的一刻開始，努力秉持作為哺乳類動物的傳統，以自己的身體撫育肥巧成長。

得到不少朋友對於我可以餵奶一年的誇獎，但當拜讀乳牛戰友eeb的乳牛一年餵奶回憶錄，發現自己的路比其他人確實平坦易行，eeb的堅持，才是哺乳類動物之典範。

肥巧天生異稟，於食方面堪稱ＢＢ界的韜韜，識揀識食，對於有益好味的媽媽奶有無止境的渴求，於印象中沒有浪費過多少辛苦泵出來的奶奶，只是有段時間生產過盛，多出的冰奶變成肥仔的媽媽奶ＳＰＡ，外敷內服，雙管齊下。至於對食具方面，肥仔更是愛護珍惜，除了出生幾天後的磨合期他啜損了我少許外，便再沒有殘害我的身體。周遭的親友由於有見肥仔身型龐大，孔武有力，也沒有說過甚麼消極的評價，在日的奶奶由於深受正確的人奶觀影響，對於肥仔食媽媽奶大，只有心存感謝，因為她的濕水欖核新抱居然有堅持的心。

在此感謝各方親友的支持，感謝肥仔對我的需求，感謝天賜一對雖少但確實是美味之源的器官給我。

識行,唔識行

2007-12-29T10:11:00.000+08:00

好多0701的小朋友都開始學行或者巳經識行,其他媽媽覺得好開心,
因為個仔/女踏進人生另一章,
但我卻慶幸Takumi仲未識行(真變態)...

Takumi個身重,加埋冬天著好多衫,
兼且佢爬得好快,所以暫時都無學行的跡象...

仔呀,千其唔好咁快識行呀,媽媽想抱你揹你多D呀...
雖然將>25磅的你掛在右肩上都幾係辛苦,
但人生數十年,將來要靠你自己行的路十分漫長,
到時媽媽只可以陪你行,不能再揹你行幫你走,
唔好咁快學行,就當送多幾個月親密時間俾媽媽啦...

(讀者唔好毛管戙,只係一時感觸啫)

Blue Boys --- Scary!

2007-12-25T23:22:00.000+08:00

Blue Boys@Elements

大得太快

2007-12-25T13:23:00.000+08:00

<大得太快> 陳奕迅

他長大得太快會令我覺得自己未大
他長大得太快會不會覺得快得要變壞

他長大後得或失會否把我氣壞
我只想今天所想的別實現太快

他長大得太快會令我覺得自己未大
他長大得太快會不會覺得快得要變壞

他長大後得或失會否把我氣壞
我只想今天所想的別實現太快

他長大得太快會令我覺得自己未大
他長大得太快會不會覺得快得要變壞

他長大後得或失會否把我氣壞
我只想今天所想的別實現太快

************************************

Takumi好快就一歲,時間過得真快。
我呢個欠缺安全感的媽媽怕佢大得太快,好快就唔要我。
所以,響呢個時候,有得抱就抱,有得揹就揹。
幸好,雖然當2007年1月15日早上7:45胡醫生將連繫著我倆的臍帶剪斷後,
我和Takumi仍然是緊緊的連在一起,
六個月以前的所有食物營養甚至水份,全都是由我供給。
臍帶雖斷,但仍然欲斷難斷,直至現在我們中間仍有一條無形(或者係變左形)的臍帶。
能夠餵媽媽奶到現在,真是太好太美妙了!

想你們 - 黎明

2007-10-24T14:28:00.000+08:00

~~~~~~~~~~~~~~~ so sweet ~~~~~~~~~~~~~~~~~~~

身處他方苦幹　人習慣了更硬朗
寧願于家中嬉戲　我怎麼可以講
夢　也記得往日睡　
誰　明內心　厭了棲身酒店房
天厚地闊無限美　怎麼可和你相比
如陌生的早餐使我　嘗到了沒你更肚餓

原諒我　遺忘這麼努力為何
常憑舊歌銘記溫馨的最初
記掛拉近　距離　
回到家　又再飛
這思念每天一世紀　
或者身處到異地
才會更珍惜這個家
遠離　全為有日再一起

~~~~~~~~~~~~~~~ so sweet ~~~~~~~~~~~~~~~~~~~

不懂的東西

2007-10-01T20:31:00.000+08:00

做左媽咪之後，學做左好多野，包括換片、掃風、煲粥、扮低能唱歌跳舞...等等，但有一樣野，原來我呢八個半月都無機會學識，就係用奶粉開奶啦，kakaka...

八月失職

2007-09-29T22:41:00.000+08:00

大件事，成日顧住幫肥巧寫blog，原來自己響呢面成個八月都開天窗無貨交，sorry呀！>.<

做個開心健康人

2007-09-29T22:24:00.000+08:00

Takumi BB最常被讚賞的，莫過於佢個親切窩心的笑容。

佢由響媽媽個肚入面開始，巳經跟著爛玩的我四圍去，所以養成一個唔怕醜的性格，宜家一聽到「去街街」呢三個字，即刻甜笑繼而飛撲過去，執輸行頭慘過敗家。在四圍都係陌生人的環境中，更會履行親善大使的責任，見人就笑，用充滿口水的肥手摸你，以及用外星話話你知佢幾想同你做個朋友。

Takumi 唔算好靚仔，但好在笑容搭夠，令佢成為大人的甜心，無人能夠抗拒。屋苑的保安員同會所的職員見到佢都會放低工作逗一逗佢，在街逛時每次都會有最少五個人聊一聊佢，屋企人放工見到佢都要錫一錫佢。

媽媽對ＢＢ的將來無太高的期望，只求佢可以同媽媽一樣，滿足於自己的過去與現在，繼續以開朗的性格創造未來，做個開心健康人。

0701媽咪大集合！

2007-07-21T07:53:00.001+08:00

搵到我嗎？我響蛋糕附近呀！

精靈混血兒BB大集合

2007-07-15T10:51:00.000+08:00

十年

2007-06-20T12:09:00.000+08:00

我個妹響佢個BLOG度寫回顧十年慶回歸，我又寫黎應一應景：

1997

二月同馬渡肥開始拍拖，開始時玩地下情，暑假響會展打完暑期工(真係做回歸晚宴)就飛左去日本住兩個幾月，悶到傻左...(巳經係住響東京)

1998

大學畢業，因為無心讀上去做心理學家，所以連論文都唔做，符符碌碌過埋third year，然後又飛左過日本好似都係兩個月，悶到痴左...因為當時係住響福井縣，一個四野無人的地方...諗起都驚...

同年九月一返香港就搵到工，在黃金海岸酒店做Marketing Communications，係我做咁耐野以黎做得最長的一份工(大拿拿成兩年呀!)，同埋真係好鍾意的一份工，雖然響觀塘住但返屯門，每日用三個鐘頭來回搭車...但真係學到好多野...

1999

繼續返工繼續飛，呢年好似無乜特別...唔係喎...好似係響海逸酒店攪訂婚...但唔係好sure...唔記得...好似係...

2000

轉左去九巴做公關，宜家都好掛住個免費乘車證...

最記得係金城武同中山美穗有套「2000年之戀」，同埋馬渡肥響呢年年尾辭左日本份工，過左黎香港等嫁俾我，我地就同居於荃灣中心，間屋可以遙望到一條瀑㳍好有氣勢，但因為大廈維修關係，馬渡肥亦響大廈地下目睹過一條好有氣勢的「屎河」，嚇到佢到宜家仲猶有餘悸...哈哈哈...

2001

7月8日響馬渡肥27歲生日之前，當時芳齡24的我決定娶左當日仲係26歲的佢，成為馬渡太太。

2002

5月4日響黃金海岸擺酒，跟住又轉工，去左Panasonic。

2003

...(待續，打到好鬼倦)

一個菜肉飽容量 = 8.5 oz

2007-06-18T17:50:00.000+08:00

為是日最高興之事，個人之最佳紀錄。明就明，唔明都唔好問，我會「間界」架... XD

倒數

2007-06-17T19:19:00.000+08:00

仲有四日返馬仔賭館，奇怪地，沒有一點的不捨，還想快一點過這四天。

沒有不捨，並不是因為同事不好，相反，在這兒認識了若干位有情有義的朋友（雖然最最最o岩咀形的兩位最愛巳經於Takumi出世前離開公司，係呀，講緊你呀！），但對於負責的工作，總是不能投入。悶確係悶，但有邊份工無悶的時候呀，但總之就不是我杯茶，沒有任何地方可以發揮創意，需知道我係一個天生廁所刷---搞屎棍呀！

無論如何，回憶總是珍貴的，雖然呢份係我畢業以來快九年的第六個工作回憶了。哈哈！

First Kiss

2007-06-16T09:49:00.001+08:00

唔係卦?咁大個人先First Kiss?仔都生埋o羅...
- 我指係同Takumi。

唔係卦?Takumi咁大先同佢First Kiss?
- 我指係第一次被Takumi主動地Kiss，唔係我抽佢水果隻。

唔係卦?Takumi咁鬼馬主動黎同你Kiss?
- 我指係當我起身烘埋Takumi度時，佢以為係開緊晨早dream feeding果餐，當左我個咀唇係奶奶，起勢用對手仔捧住我塊面，一口啜落去我個咀唇度，即刻成個人軟晒...

但當佢發現咀落去唔同feel同埋無料到時，即刻睜大對訓覺眼，繼而淒涼地喊左幾下，心甜的媽媽即係我，就給王子樣送上美味可口的早餐...XD

擇善固執

2007-06-14T14:55:00.000+08:00

Takumi呢五個月以來都係全人奶BB，更是一個超磅的全人奶大隻BB，而我...hem hem(清清喉嚨先)...已經由昔日的小籠飽變成菜肉飽...kakaka...夠餵飽一個大食仔...

奶媽其實不易做，首先響醫院要捱住傷口痛隨時on call去育嬰室餵仔，無可避免地會俾阿仔啜損(我地兩個都係新手黎的)，忍痛，又要喪飲暖水及湯水上奶，搞到水腫，谷奶谷到週身唔聚財...

出院回家後同Takumi一齊經歷一個又一個的猛長期，我仔不離手，佢死不放口。初期黃疸又退得慢，我又要餵得更密，搞到左右手都媽媽手...最痛時連扭開樽蓋的力都無。

坐月時要俾心機儲奶，泵泵泵，雪雪雪，最刺激的一次係雪櫃壞了要融雪修理，冰格入面的幾十包冰奶要急急護送到媽咪屋企，有驚無險，但就教識左我一樣野，Don't put all your milk in one fridge！哈哈。

返工後又要擔心泵奶，譬如泵得順唔順啦，泵得多唔多啦，泵得清唔清啦，泵得快唔快啦...其實最難配合的一件事，就係可以響邊度泵，宜家響公司無房，又唔係好願去厠所，好彩Tea Lady有間無鎖(!)的工作室，入面有櫈有枱，泵奶Good Fit，我就咁就泵左兩個幾月了...

響媽媽奶的豐富營養及神奇魔法，加上成家人的萬千寵愛之下，Takumi成長成為一個Happy Baby，遇人就笑，見野就食，倦了就睡，當然餓了就喊...學屋企人話齋，好湊...

香港人普遍未接受母乳餵哺，我都被許多朋友問過媽媽奶的營養是否夠BB用，夠唔夠佢食，是否應該補點奶粉，Takumi的爺爺(女麻)(女麻)響日本咁方便寄聰明奶粉黎，點解唔食，呢個時候，我會指住個仔同佢地講：「咁樣仲要補奶粉？」「唔夠營養會唔會咁大隻呀？」「屋企成雪櫃都係冰奶存貨，你話夠唔夠食？」「聰明奶粉點及聰明媽咪的奶勁呀？」即刻靜晒。

有媽咪曾經講過，羊BB飲羊奶，牛BB飲牛奶，豬BB飲豬奶，狗BB飲狗奶，人BB當然要飲人奶，講得好！各位將為或將會再為人父人母的朋友，當你決定唔俾BB享受媽媽奶之前，請三思。不是說飲牛奶是離經叛道之事，但當有更好的放在面前，是否應該Give the best to your child? Or, at least give it a try?

擇善固執，是我同埋幾位響BK認識，素未謀面但關係亦師亦友的奶媽戰友的座右銘，因為我地都係想俾最好o既野俾BB，which is so precious and will benefit them for their whole life! 努力加油啊!!

A Make Over

2007-06-10T22:48:00.000+08:00

Takumi's Blog的make over差不多完成，跟住就係呢個Blog，點整好呢？

動左了！

2007-06-02T00:03:00.000+08:00

遞了辭職信，如無意外，新工作將於6月25日開始。今年話龍年愛情事業兩得意，應晒啦，有工轉。但唔好以為我得意的愛情係同馬渡肥，其實我最愛的honey係Takumi豬呀！kakakaa... XD

靜極思動

2007-05-24T10:07:00.001+08:00

又係時候。

忙上網

2007-05-23T08:20:00.000+08:00

我上BK就大家都知啦，宜家仲要上埋0701baby.net，忙上加忙。我響日常生活多野講就個個都領教過，網上世界上面的我都係一樣貫徹人物性格，kakaka...所以，好忙！

借此多謝一班有心媽媽對0701會的付出，十個「叻」俾你地！

紀念日CUBE

2007-05-04T08:08:00.000+08:00

今日放假，因為要慶祝三個紀念日：

1997.5.4
馬渡肥響中大做完一年交換生，返去日本，當年今日前景未明，就是一個生離死別的日子，因為當時的我們或許就會永遠不會再見面...

2002.5.4
馬渡家長子及黃家長女擺喜酒的日子，其實我地巳於前一年的7月8日（馬渡肥7月9日）生日，為及不要與當年只有24歲的我年齡相距多一年，所以要趕於生日前一日註冊，結婚cert上面寫住26歲，低能！），但為紀念，特意選5月4日擺酒。

2006.5.4
日本東京之旅，製造Takumi之旅，小Takumi由一條由顯微鏡先睇到的蟲蟲變成家下成8KG的超大碼BB，生命真神奇！！

愛煞Youtube

2007-04-30T09:25:00.000+08:00

雖然我練得一身好功夫，可以一路餵奶一路ICQ/MSN，但當無人同我玩時，就會覺得異常無聊，長時間情深款款地望住阿B的話，我條頸又會痛到死...

呢兩日放假餵奶時，上Youtube搵到"溏心風暴"足本睇...追了兩日終於追完無睇果集...笑到爆晒咀...我自己一路睇一路笑，阿仔就以為我同佢玩又響度笑，我見阿仔笑又再大笑...呢兩日響屋企餵親奶就係笑...好正呀!我愛死Youtube & upload"溏心風暴"的user!!!

恭喜小中

2007-04-21T11:06:00.000+08:00

恭喜老鬼小中於最佳員工中摘冠，呢個奬得來不易，要唱歌，寫書，跳舞，畫畫，設計，電腦，拍片，司儀......樣樣皆能先得，好勁呀！！

從善如流

2007-04-21T11:03:00.000+08:00

收到多位讀者投訴，話我生左仔之後懶晒，好耐都唔寫一次blog。哈哈，sorry sorry，湊仔實在要好多時間，但我應承各位，我會響公司偷懶偷Ｄ時間出黎寫下blog，哈哈哈！各位請拭目以待！

被需要的感覺

2007-03-24T13:30:00.000+08:00

阿仔出世後，好多人問我有無覺得自己成熟左。講真，無喎，我咪又係揹住個仔去扭蛋，同個仔講鄭中基腔的話，一面餵仔一面睇「我們呢家人」，無話特別大個左，不過就有一種好被人需要的感覺。

雖然阿仔有大把奶奶儲備，但總有食完的一天，阿仔需要我返工後都要諗辦法幫佢預備多Ｄ奶奶；

阿仔食咁多次支樽奶奶，我都未見過佢食完後好滿足咁笑，但次次「啜啖先」之後都會發出果隻drunken sailor的滿足笑容同埋搞到面仔紅紅，佢需要媽媽俾佢滿足oral need；

阿仔或者未知我係佢媽媽，同埋唔知乜野係媽媽，但我對於佢係有一種特別的情意結，佢需要我去安撫佢的情緒；

所以有左Takumi之後，我覺得自己的生命變得重要，因為有一個表面好強壯，但其實好柔弱的小生命需要我去保護同教育，呢種可能就係之前好多為人父母話俾我知果隻養兒樂。我到現時都好享受呢隻被需要的感覺！

想返工，但又好掛住ＢＢ

2007-03-19T17:35:00.000+08:00

天下間有無一份工可以帶埋阿仔返的呢？
天下間又有無一份工可以響屋企一面照顧阿仔，一面做的呢？
阿Ｂ從來都無離開過我超過四個鐘頭，我都係未試過離開佢超過四個鐘頭。
今個星期五公司有大event要返去幫手，下晝到夜晚八點。點算！？
會係我掛住ＢＢ多Ｄ，定係ＢＢ掛住我多Ｄ呢？
實會一做完飛的返屋企，超掛住！
我諗我的士皇后呢個朵，都有排唔會除去！
我支持八折的！

出街玩

2007-03-19T08:03:00.000+08:00

3月16日同Takumi到又一城，與一班人奶BB見面。席間Takumi發揮媽媽的最長處，做個親善BB，與其他BB玩。三個B入面我個B係最細的，但卻是最大件頭，得人驚！

溫柔的老公，可愛的阿仔

2007-02-28T22:21:00.000+08:00

各位見慣我老公的傻樣，是否第一次見到咁溫柔的馬渡肥呢？睇下阿仔幾lum幾幸福！！

媽咪唔易做

2007-02-23T22:11:00.000+08:00

呢一個月零一星期係我咁大個女遇到最多問題的時期。

各位都知我其實係一個大細路，一粒濕水欖核，一個十三點，事事都得過且過，是但求其，唔死得就算嫁啦。但做左媽咪之後，對於小肥巧的一切我都要認真鑽研，事事求真，不能有所差池。

例如點解佢會喊啦，不同的喊聲代表乜野啦，點解有Ｄ叫猛長期的東西（現在正是，不斷要啜我，重要勁惡），面上的粒粒點樣處理啦，有痰又點搞啦，點樣唔俾佢扎醒啦.....我之前鬼識咩！

好處身邊有幾位經驗媽媽，得閒打電話俾我等我發問，又好彩呢個世界有INTERNET，有BABY KINGDOM，班網友勁幫手，仲勁好人，邊個話網上識朋友會俾人呃呀（呢句俾芬妮姐聽），我先至餵到母乳，知道一Ｄ湊仔常識！

除此之外，又成日擔心小肥巧會否太熱太凍，有無呼吸（我成日用手指擺佢個鼻度測試，哈哈），夠唔夠營養，夠唔夠訓等等，總之就多野擔心啦！

各位朋友請原諒我無同你地拜年，無同你地吹水，無成日update個blog，因為媽咪真係唔易做，俾多小小時間我去適應先啦！

忙...忙...忙...!!!

2007-02-09T10:27:00.000+08:00

忙乜？如下圖...（為免成為III級網站，相片又係經過特別處理，哈哈！）

終於明白旺角一眾過皮肉生涯的生活如何枯燥...不斷除衫，著衫，除衫，著衫...但，為左阿仔，

我會做好呢份工！！！

放產假 - Day 3

2007-01-13T19:47:00.000+08:00

今日返深井清潔舊屋（馬渡肥做），同埋交返鎖匙俾業主，正式結束背山面海的生活。回家後要好好收拾屋企，因為聽晚便要入院，回來時無了個肚仔，但就多個皇帝仔！

還有一天多，小肥巧便出世了！尋晚再度下個肚，嘩，成44吋，幾得人驚！響我過去好忙的一個星期，小肥巧又再俏俏地吸收我的日月精華，真係好想知佢星期一出世時有幾大！

（由於紅色的肚紋實在太驚嚇，費事影響大家對我的遐想，相片經過特別處理，哈哈！）

放產假 - Day 2

2007-01-12T11:01:00.000+08:00

今日又會出街，到尖沙咀同肥肥去銀行準備Takumi的出世錢，然後一齊同K小姐及靚妹食飯。今日會去尖沙咀的Sushi Hiro，正，諗起件海膽壽司就流口水！

跟著要去買Takumi的奶粉同埋濕星野，然後返屋企執屋！

放產假 - Day 1

2007-01-11T09:20:00.000+08:00

經過連日來的忙碌工作，今日終於可以安安樂樂開始放產假。一如平日，馬渡肥起身後睇NHK，擾人清夢，叫佢關房門，佢死都唔制，話我如果繼續訓，夜晚實行好精神，到時佢就慘！

惟有起身上網，煲兩隻蛋蛋俾Takumi食，飲杯鮮奶，執下阿仔的衣服，一陣就出街去胡醫生度檢查，之後去做負離子，正！終於可以做返個正常人！

尋晚收到同事送來的賀禮及賀卡，肥肥一見到就將過千元的SOGO禮券沒收，淨返張卡俾我睇......慘！

阿仔呀阿仔，仲有幾日你就出黎呢個世界啦，乖乖地響個肚入面吸收多Ｄ，出黎之後阿媽唔知夠唔夠你呢個大隻仔食呀！！！XD

前程似錦

2007-01-06T07:37:00.000+08:00

兩位我好愛的同事即將分別離開公司，對於轉慣工慣於面臨這「生離」的我，沒有太大的傷感，因為我離開左咁多間唔同的公司之後，其實仲係同班同事keep住見，keep住出黎玩，感情不知幾好，只係無得日日見！

沒有你地響公司的日子，相信我一定會做野做得快Ｄ，因為唔駛掛住吹水，但另一方面我個口一定會發臭，慘！

芬妮姐：你係個叻女，確實可以考慮下做Ｄ創作性高Ｄ的工作，趁後生好快Ｄ選定條路，再過多一兩年就會定了型，到時想轉都有心無力！（呢次你要信我，因為我話晒係個轉工天后）

K姐：相信不斷有工見的你將會好快帶來好消息，唔好俾技安左右你自己的決定，有Ｄ野，男人，尤其係無乜轉工經驗的男人，係唔會明白的。（我從來都唔會同老公商量轉工的問題，只會知會佢，因為佢係一個不喜歡轉變的人）

(^^) 總之就係一句友誼萬歲，多謝你地豐富了我在悶蛋工作的日子！

好忙的前一

2007-01-05T00:10:00.000+08:00

返埋下星期三就放產假，由呢個星期六開始都會好忙好忙：

星期六：拿新屋鎖匙，執屋
星期日：搬屋，執屋
星期一至三：返工，趕event
星期四：返胡醫生度最後檢查
星期五：想偷雞去做負離子（二小姐，請勿爆響口）
星期六：返舊屋執好間屋
星期日：交還鎖匙，夜晚入院準備開刀
星期一：Takumi出世

之後後九......有排忙!!

超級巨嬰

2007-01-02T19:30:00.000+08:00

今日覆診，胡醫生話阿仔確實係超級巨嬰，人仔細細只有37週，就有7.8lbs，而佢咁大隻，又唔係因為我有妊娠期糖尿，我真係唔明點解阿媽無乜食有營養的食物但阿仔可以咁犀利！

胡醫生話如果我呢幾日生，就有50%機會可以順產，但如果遲多兩個禮拜先生，就最好唔好搏，開刀會好Ｄ！

阿仔幫自己決定了，佢會響2007.1.15(Mon)7:30 am出世，我會響荃灣港安，到時黎探佢啦！:D

自己生？開刀生？

2006-12-31T20:08:00.000+08:00

呢幾日就係為左呢個問題而煩惱，說實的，本小姐為左Takumi呢個ＢＢ就早響約兩年前著手準備。首先係在懷孕前一年多巳經停服任何藥物，之後開始食幫助ＢＢ腦部發展的葉酸，五月Made in Japan之旅後更加保重身體，希望Takumi身體健康。如果為左一張病床而要Takumi響未ready的情況下開刀執佢出黎，好似確係唔係幾好！

總合家人、朋友們及網友們的意見，可以自己生的話就自己生，無謂開刀，就算最差的情形下無私家醫院生要去政府醫院，都只不過係三日兩夜，好過開刀傷元氣。

星期二胡醫生放完假回來，會到診所檢查，到時如果醫生話我可以自己生的話，我就交個話事權俾Takumi，由佢自己決定幾時出世了！（大契媽想你同佢同一日生日呢！）

橫掂被迫開刀，實行谷肥個仔

2006-12-26T22:54:00.000+08:00

響大６人的強攻之後，香港的政府同私家醫院相繼失守，香港媽咪連生仔創造人口而應得的福利都無埋。宜家醫院的情況正好印證了「錢唔係萬能」的道理，就算我肯俾幾萬蚊去生仔，都唔代表私家醫院有床位俾我，亦唔代表我可以有應有的待遇。

算把啦，把心一橫，開刀就開刀啦，費事到時六神無主，最終要入政府醫院生仔就死得了！既然選擇開刀，我決定趁呢幾個星期更加谷肥我個仔，等佢生出黎之後好湊Ｄ！

牛扒呀，牛奶呀，雞蛋呀，花膠呀，全部唔會避忌食晒落肚，阿仔記住好好吸收呀！！！

有得震，無得訓

2006-12-26T05:08:00.000+08:00

阿仔唔知係咪今晚開party時聽到太多小朋友的聲音，所以興奮到成晚手舞足蹈，搞到我訓都訓唔到。

你知嗎？宜家係凌晨五點鐘呀，阿媽要訓覺呀，郁少陣等阿媽訓一陣啦，係咁上網寫blog都唔係辦法喎！做個好心啦唔該！ @/-_-\@

平安夜，悶蛋夜

2006-12-24T23:36:00.000+08:00

雖然結婚之後的每個聖誕節都沒有結婚前的浪漫（其實結婚前都不是怎樣浪漫，但起碼是我飛到日本或都是老公飛黎香港），但起碼都有個貴Ｄ的晚餐食下。今年的平安夜聖誕節都只有幾個字：在家發呆。Takumi仔剛剛在肚入面做完一輪瑜珈，身體摺黎摺去，手腳撐黎撐去，攪到我幾鬼唔舒服。醫生唔准我食糖份高的東西，今晚無得食聖誕蛋糕，只有吃一碗米粉飽肚，慘！！！

明天有聖誕節派對，都唔明點解要叫個大肚婆負責遊戲，我個肚真係籮咁大的，乜都未做，明天先算！！

血糖高？！

2006-12-24T19:24:00.000+08:00

星期五下午到胡醫生處覆診，一入到去佢睇住上次抽血化驗的結果，就皺住眉同我話，你Ｄ血糖數值好唔掂喎！正常係6.5，你係8.5。跟住我就駁咀話，梗係啦，上次因為太多人等，姑娘叫我同老公去食飯，食完飯未夠15分鐘就俾你抽左桶血去驗（我跟餐仲飲左柸熱朱古力，當然呢句就唔敢講）。胡醫生話好驚我患上妊娠期糖尿，因為Takumi的size比同期的ＢＢ大，35w就有成6.5lbs，於是俾佢迫我星期六要去化驗所做個血糖測試，即係飲一柸糖水前後抽血，比較pre-test同post-test的結果。柸野勁難飲，做要抽兩桶血期間要坐響化驗所兩個鐘，老公有陪我，但我地都悶到癲左。醫生話如果真係血糖太高要見營養師，食無味餐，死得了！

好友的浪漫求婚記

2006-12-21T10:05:00.000+08:00

所謂「冬大過年」，冬至對不同的家庭而言有不同的意義，好友K今年的冬至，相信係佢三十年來過得最不一樣最難忘的一個節日。

話說尋晚響一間遠近「馳名」，出名「好食」，服務「一流」的屋邨酒樓入面，坐著一家三代同堂的林氏家族。突然間技安出現，令K喜出望外，再加上技安響大庭廣眾，鄉紳父老前提親，送上閃爍鑽戒一枚，更令人心花怒放。

總結是次提親，以下四個W值得讚賞：

When
有誰估到於浪漫的平安夜及聖誕節前夕，會有人選擇冬至黎求婚?

Where
又有誰估到有山頂海旁唔去，響屋邨酒樓求婚?

Who
一生人一次的求婚專登揀響父母家姐姐夫細妹同細路仔面前做，確係要無盡的勇氣!!

What
鑽石恆久遠，一顆永流傳，加上惹味魚香茄子煲同大良炒鮮奶，一絶!!!

好鄧K小姐開心，因為技安確實係一個持家有道的住家男人，都係果句，只要用心做的都能感動人。見到K小姐成個朝早笑笑口，打不還手，罵不還口的情況，令我呢個無得出街的大肚婆都感到開心興奮!!!

混血兒ＢＢ媽咪聚會

2006-12-10T00:03:00.000+08:00

今日帶住Takumi去Conrad同幾位都係生混血兒ＢＢ的媽咪食Tea Buffet聚會，出席的混血兒ＢＢ入面有中韓、中英、中澳、中泰、中非，同埋我個中日Takumi，佢地幾個ＢＢ一齊玩，吸引住隔離枱同埋侍應的目光，真係好得意！Takumi仔聽到班ＢＢ的叫聲又異常興奮，成個下晝都撐手撐腳，好似好想同佢地玩咁！佢地話CNY再搞聚會喎！到時Takumi仔應該巳經出左世了！

阿仔，媽咪對你幾好，未出世就幫你識班朋友仔了！:D

準備

2006-11-26T19:36:00.000+08:00

等左成個星期，太陽伯伯終於肯現身了！趁有太陽，今日將買俾Takumi仔的衫衫同被被拎晒出黎洗，等乾之後放入密實袋，了左件心事！話時話，原來我幫Takumi買了好多東西：

﹣連身衫（９件）
﹣和尚袍（７件）
﹣口水肩（６條）
﹣Winnie the Pooh包被（１塊）
﹣綿背心仔（１件）
﹣冷衫（１件）
﹣Disney松鼠仔衫（１件）
﹣睡袋（１個）
﹣帽仔（１頂）
﹣手套腳套（各１對）

另外仲有Miffy濕紙巾同尿片添！

不過最緊要的床仔同被鋪仲未買，下星期要同肥肥努力揀啦！

散文集

2006-11-25T08:47:00.000+08:00

作為Takumi的媽媽，當然會俾佢最好的東西。為紀念呢個馬渡家同黃家第一個ＢＢ仔的出世，本小姐現正努力將呢個懷孕期間所發生的事寫成散文，希望可以結集成書，送給小Takumi。散文的內容全無連貫性，只是隨心所欲，想寫便寫；亦未想好會否真的會排版編印，還是網上發表。但請各位密切期待馬渡黃婉儀才女的處女作！！XD

人黑行路打倒「吞」

2006-11-15T21:24:00.000+08:00

今日返工，一早俾一位「尊貴的」的秘書小姐老屈，好彩我真係無做錯事，如果唔係真係炒得！為左記錄低我同佢的對話，寫了近三版的「狡辯」報告，你知啦，大肚婆無記性，真係好快會唔記得講過乜！寫呀寫，抬起頭來巳是午飯時間！！（於同一時間姐姐同另外一位同事亦分別遭受到另外「尊貴的」的厚待，分身不下，忙到停不了！）

好啦，食完飯返黎，就開始不斷咁做，無野架，人工包的。到放工，搭巴士返屋企，點知到上環上左個阿叔坐我隔離，佢個身好大浸味，仲不斷打喊路，臭到呢，都唔知點形容。「好彩呢個時候有Tempo」，茉莉花味救了我同Takumi一命，而佢到深井就轉到另一個位座。

巴士繼續往屋企方向行，點知到浪翠三期時就見到出面好多紅色藍色閃閃燈，差人叔叔就同司機講話唔可以繼續向前行，要調頭，向前望，見到一個旅遊巴橫放了在馬路，真係大大鑊。惟有在三期落車，行路返四期的屋企。

你知嘛，響呢個落雨的晚上，響呢條無左街燈的高速公路，響無人陪伴之下，一個大肚婆，捧住個大肚，撐住把遮，著住對唔係好舒服的鞋，好慘好慘咁行返屋企，真係聞者傷心，聽者流淚。好唔容易返到屋企，打電話給到了大陸工幹的肥肥，點知肥肥個電話收唔到，連扭計的機會都無，真係......慘絕人圜！！！

好黑，今晚都係早Ｄ上床目訓，渡過我的黑色星期三！

我的大肚DUMP

2006-11-11T21:56:00.000+08:00

從另一個角度看我的肚！

無錯，呢個係我個肚，果對亦係我的腳，好得人驚！

攪掂晒！

2006-11-08T20:46:00.000+08:00

尋晚到曉暉見業主兼簽埋租約，1月6日可以交匙，距離Takumi出世仲有幾星期，夠時間準備好新屋等小Ｂ誕生！

曉暉花園響飛鵝山山腳，在彩虹地鐵站有專車上去的，環境當然比不上浪翠園，但都好風涼水冷，幾好的！

不過租金就幾係貴，成$9K，老公話我地每人每日要用少$50，一個月先可以慳返$3,000補償，好慘呀，無得搭的士呀！！！(-_-)

睇樓記(3)

2006-11-05T21:55:00.000+08:00

今日再去睇曉暉花園，即刻搵到心頭好，間屋唔係好高層，十一樓，向住飛鵝山，好好風。好處係果度無清灣道八號空氣咁差，而且入面乜野都有，衣櫃鞋櫃書櫃電視櫃床梳化所有野都齊全，真係搬返Ｄ衫同日用品就住得。仲有就係間房好大，Takumi張床仔放埋入黎都仲有好多位，老公話小朋友頭幾年都要同父母瞓，呢個係佢地日本的傳統。

打電話俾老媽子報告，佢話一定要小Ｂ出世後先至搬屋，所以請agent同業主講可唔可以一月尾先起租，以為佢實唔肯啦，點知個業主好好人（其實佢好揀客），話等幾個月都得，不過會同佢簽兩年租約。星期二會同業主見面，應該會簽埋租約，了結左搬屋件事。

各位朋友，等Takumi出世後你地可以隨時黎彩虹探我啦，唔駛入深井咁死遠啦！XD

小震蛋

2006-11-02T23:11:00.000+08:00

從來都不知道震蛋會帶來甚麼感覺，但當Takumi一日一日長大後，佢日日夜夜每隔一陣就震我一震，每次仲維持幾分鐘，就好像將震蛋放錯位置般，麻煩到不得了！

話雖如此，當Takumi小Ｄ郁時，又會擔心佢響入面做乜，真茅盾！！

睇樓記(2)

2006-10-29T11:57:00.000+08:00

尋日再去睇樓，分別係藍田麗港城同觀塘月華街。

麗港城---
Takumi的幼稚園在麗港城四期，於是我地就集中火力睇果一期。Agent話果期其實係用料同設計較好的一期，但上到覺得完全唔掂，大堂啦，𨋢啦，門口啦，內籠啦，景觀啦，無一樣可以值得我俾$8K/9K去租。總之睇完之後我同老公講我點都唔會住響度，怕怕！

月華街---
想當年我仲讀緊小學的時候（即係二十幾年前），覺得住月華街好好嫁，好多有錢Ｄ的同學都係住響月華街。但尋日去睇真係嚇死我，無煤氣嫁！無衞星電視嫁！無浴缸嫁！看更係無著制服只係著短褲拖鞋的阿伯！仲有一梯好多伙，走廊門口好核突嫁！我老公全程都無講野，睇黎佢真係「予欲無言」，我諗佢咁大個仔都未去過咁樣的地方...我都係！

(Kelly, 阿蘇，千祈唔好話俾肥仔聽！！）

經過尋日的行程，老公好高興決定了一件事，就係只可以搵曉暉花園或都清水灣道八號，貴Ｄ就貴Ｄ！XD

睇樓記

2006-10-22T21:50:00.000+08:00

尋日同老公去睇樓，為Takumi的出世作準備，前後睇左兩個屋苑共七個單位，就係清水灣道八號同埋曉暉花園。

清水灣道八號---
位置方便，地鐵上蓋，巴士小巴總站隔離，全新單位包無用的環保露台，入口大堂成間酒店咁靚，但租金方面開到成$12,000-$13,000，估計可以傾到$10,000。肥肥就鍾意，因為有一個佢一年都唔會去一次的豪華會所，同埋有巴士直達佢公司。此外，亦有一架由娘家點到點的小巴，落雨都唔會濕身。

曉暉花園---
似宜家住緊的浪翠園，下下都要搭車先買到野，但環境好舒服，自成一閣。可惜睇果間屋的景觀唔掂，不在考慮之列，但都要租成$8,500，估計可以傾到$8,000，但點都唔會租呢個單位，完全無view。

好彩阿Ｂ仲有成三個月先出世，但佢個麻煩老豆要求極高，睇黎搞搞下年尾都未有決定。其實只要佢俾我揸車，佢就可以住返響呢度，佢話佢住響浪翠園一世都得嫁......

睇下事情的發生又會係點！

馬渡雞雞

2006-10-17T22:15:00.000+08:00

我幫肥肥買的Halloween Party帽子，係咪好得意呢？？

萬聖節派對

2006-10-15T10:38:00.000+08:00

今日老公一早到會所book宴會廳，因為我地響10月29日要搞Halloween Party，參加的大朋友同小朋友會扮鬼扮馬，我要開始構思當晚要扮乜野，初步黎講馬渡肥肥要扮吸血彊屍，所以要去幫佢搵對假牙先！我咁大個肚，睇黎都係扮大肚巫婆算了！下年Takumi就會係9個月，最好扮南瓜ＢＢ，哈哈！XD

給朋友......

2006-10-09T23:56:00.000+08:00

自從有了ＢＢ之後，便沒有費心神舉行活動與各位聯誼，愧當CEO (Chief Entertainment Officer)一職！

但我個Takumi一日一日長大，莫說是唱通宵Ｋ，連出街玩夜點也有點力不從心，好想快點回家攤......只有暫時犧牲一下同朋友玩的時間，等到小Ｂ出世之後，就是我從出漿胡之際！仲有四個月！

好想去唱Ｋ玩大話骰呀！！！！

花好月圓中秋節快樂！

2006-10-02T22:20:00.000+08:00

大陸人生仔潮

2006-10-02T08:28:00.000+08:00

相信近日香港大肚婆最關心的，就是大陸孕婦來港生仔潮。

作為納稅人的我，當然希望情況不會繼續惡化，不然政府又會向我們開刀，加稅減褔利就弊了。但另一方面，作為媽咪，我又好了解佢地的做法其實同天下所有媽咪一樣，是想為ＢＢ的前程著想。

對於我個Takumi來說，大陸ＢＢ對佢的影響不大，因為佢出世後可以攞日本passport，而且我巳經決定在一間稍為少大陸人幫襯的私家醫院生，第日佢讀書會入日本人學校，大過之後佢應該都會返日本讀大學同發展。

老公話其實香港人在97前移民潮時咪同班大陸人一樣，想盡辦法到英美澳生仔，為的是幫ＢＢ攞外國護照，為將來買個保障。相信宜家香港人對大陸人的不滿，相當於當時英美澳人對香港人的歧視。以五十步笑百步，其實都唔係咁應該。

講真，要我地呢個無能的政府長遠解決呢個問題簡直係天方夜談，不如首先解開自己的心結，ＢＢ仔係有無限的可能性，如果佢地真係黎香港讀書，受正常教育的話，未必會對香港造成負擔。好多之前在外國出世的香港小朋友，宜家讀書咪又係好叻，大過後又有機會在外國的大機構做事，搵好多錢支持當地的經濟！

++++++++++++++++++++++++++++++++++++

優化「港產大陸嬰」質素(星島) 09月 25日星期一 03:30AM

一位雙程證孕婦締造了本港火車站月台產子的「佳話」，除添丁之外，又為兒子取得居港權，可謂「雙喜臨門」。愈來愈多內地孕婦來港產子，對醫療資源產生立竿見影的影響，當局還需要探討這「新一類」香港人對社會資源帶來甚麼影響，以及如何培養他們對本地作出的貢獻。

終審法院(相關新聞 - 網站)在二○○一年的男童莊豐源案裁決，指出在港出生的中國人，就算父母皆不是香港永久居民，也有居港權。消息經過一段日子消化，內地孕婦來港產子數目激增，初靠偷渡，後靠雙程證，到○三年有了自由行，就更加方便。公立醫院在○四／○五年度有一萬二千多名「非符合資格人士」產子，比早一年急升四成，每三個新生嬰兒中就有一個的母親不是香港人。部分私家醫院產房更是「其門如市」，八成產婦來自內地，醫院提供的一萬八千元產子「套餐」，比公立醫院的二萬元收費更為便宜。

補本港出生率不足

內地孕婦來港產子，即時可見的問題包括安全和金錢。不少孕婦為了省錢，拖至最後一刻才到醫院，缺乏產前檢查，昨日的個案連醫院也趕不及前往，去年也有自由行孕婦逾期居留，待至產前一刻才召的士入院，嬰兒在途中已經急不及待在車上出生。此外，孕婦濫用本港的公立醫院機制，產後不付款急急出院去如黃鶴，更屬司空見慣，令醫院撇帳倍增。

從正面角度看，內地孕婦除了令部分私家醫院生意「起死回生」外，也有助本港人口年輕化。港人近年出生率低，近者導致「殺校」，遠者面對養老負擔，行政長官曾蔭權(相關新聞 - 網站)叫港人「生三個」，有多少人響應成謎，但內地孕婦卻能提供大批在港出生的「生力軍」，以補不足。

避免加重社會負擔

以前本港擔心大批內地兒童來港入學對教育資源構成壓力，現在則學齡人口萎縮，如果這些嬰兒長大後來港入學，反而有助保障教育體系的持續性。同樣，在想到這些嬰兒長大後對本港住屋、福利綜援、醫療等方面的種種負擔，當局也要作出深入的正負面影響評估。

終審法院的判決已經是不容推翻的事實，除非當局決定要修改《基本法(相關新聞 - 網站)》對居港權的定義，否則就要面對這類嬰兒長大後來港的問題。根據過去的經驗，來港定居的內地人年紀愈大，一般來說適應力愈低，要社會照顧的依賴愈高。與其光從負面角度來看這些嬰兒帶給本港社會的壓力，不如及早籌謀如何發掘這批人口的潛力，優化素質，使他們不但不會加重社會負擔，反而成為社會的新動力。

郁黎郁去

2006-09-25T22:24:00.000+08:00

我個Takumi小Ｂ近來在肚入面郁得好勁，有時響肚皮上更見到佢郁下郁下，感覺好得意！但唔知點解當佢爹地放隻手上黎時，佢就好頑皮地停低整鬼佢，好能唔鍾意隻熱辣辣的大肥手啦！

尋日到Lilian姨姨的家探Arthur，呢個MIX BB真係靚仔到不得了，可惜我媽咪唔准我抱其他ＢＢ住，所以無得黎個近距離接觸！我個中日MIX Takumi個樣會係點呢？最好只係似爹地個鼻同身高，其他跟住我啦！hehehee XD

歌唱比賽

2006-09-23T07:36:00.000+08:00

好友中san今晚粉墨登場，參加我前公司集團的歌唱比賽，中san當然會悉力以付，台下的我們亦必定會努力打氣，掂呀！

越來越重

2006-09-20T22:54:00.000+08:00

呢排個肚大得勁快，站直身體向下望時巳經看不到腳趾，好得人驚！因為Takumi的高速生長，對我造成的負擔亦越來越大，行步路都好像舉步為艱，勁慘！可能呢Ｄ就係為人媽媽要承擔的第一步！

但不知死活的馬渡肥居然話「不知不覺」Takumi大了這麼多，當然啦，你點會知，點會覺呀！

運

2006-09-16T23:20:00.000+08:00

睇電視播側田的演唱會，突然對呢首歌好有感覺。

響好多人的心目中，我呢三十年的生活都好似風平浪靜，無驚無險。家庭方面，雖然我響屋企排最大，但由細到大都唔駛肩負做大家姐的責任，有時仲好任性。讀書方面，又成日恃住點小聰明，挑燈夜讀，懸樑刺股，通通無我份，反而逃學上堂傾偈食零食就樣樣齊，但又次次過到關喎。愛情方面，不得不承認，馬渡肥肥係我認真拍拖的初戀情人，到宜家都成日打情罵悄，都幾係驚，加埋未出世就巳經活潑到不得了的Takumi，確係幾好。事業方面，一路都無乜野心，但靠把咀吹水同悉心舖排的Profile，做親都係大公司，人工都OK...

作為基督徒（雖然唔乖），我真係感謝神俾我的生活，更要感謝的，是衪給我一個閱讀世界，解讀世情的能力，簡單來說係一個阿Ｑ的心，凡事放開點，正面點，樂觀點，生活就會如意！與各位好友共勉之！！

+++++++++++++++++++++++++++

運

曲 : 側田(On Your Mark) 詞 : 方杰編 : Ted Lo 監 : 雷頌德

趕趕不上搭夜航機
結尾呆望跑道上沙粒轉眼揚起
到半夜遇到風雪失事了
沉沒了證實機長都已死

假使那夜及時趕到了
也許漂流在孤島等了年幾
先清楚自己這麼有運氣
能在海關感嘆世事沒完美

當好景不再我們來聽聽
你到底出聲打氣還是只懂得怨命
我相信際遇如一面鏡用笑代替哭聲
霉運才能撥正 oh 一息間充滿困難
何必驚跌進海驚險之際
前面會有某座潛艇沿路定有獎等認領
情願坐著怨幾聲還是努力搏取拍掌聲

怎麼叫運視乎你心理
捱盡黑夜便可看得到晨曦
極運滯日子都不要忘記
還在呼吸心跳我未被遺棄

當好景不再我們來聽聽
你到底出聲打氣還是只懂得怨命
我相信際遇如一面鏡用笑代替哭聲
霉運才能撥正 (手掌)到底奮鬥心不死
渡過低潮我先見到熱潮
成熟了明白了才悟到了命途的奧妙
這刻充滿困難
何必驚跌進海驚險之際
前面會有某座潛艇沿路定有獎等我去領
結果不得要領我都可給我喝采聲

二字頭的最後一夜

2006-09-14T22:57:00.000+08:00

1976年的明天，我從媽媽的肚中乖乖地爬出來，開始一個漫長的生命之旅；
2006年的明天，我終於要和二字頭說聲再見，開始三張野的階段；
感歎嗎？些少；
懊惱嗎？不然；
回想一下，我三張野時，巳經完成了許多許多事情：
結婚、生仔、碩士畢業；
還有甚麼好懊惱呢？
三十而立，並不是男人的專利；
女人三十，好應該為將來想一想；
將來，亦不是想怎樣幹一番事業，
只想學懂怎樣相夫教子，培育Takumi。
但有一件事是必須的，
重投我最喜愛的公關行業，
幹瑣碎的事多了，
令一向頗為自滿的筆也開始鈍了，慘！

Baby Boom, Marriage Boom

2006-09-10T12:23:00.000+08:00

自從有左Takumi之後，身邊的朋友一個接一個傳來喜訊，都係有左ＢＢ，或者係決定結婚。

同我一齊成長的朋友今年年屆三十，好明顯大家都係趁呢個里程碑做Ｄ應該做既事。三十歲了，要玩的玩夠皮，係時候想一想未來的生活。

在此恭喜以下的朋友仔：

Auntie L: 大隻Ｂ哥哥上個月順利重磅出世
Auntie P: 小Ｂ同Takumi一樣係2007年1月BB
Auntie E: 小生命正在肚入面努力成長
同事C: 小Ｂ女今日出世
同事P: 今年12月舉行婚禮
同事K: 打算下年6月做個June Bride
契媽L: 下年8月拉埋天窗
同事C: 下年應該結婚，日子未定

喜事一籮籮，可喜可賀！！ :D

點解！！

2006-09-09T00:31:00.000+08:00

點解公司的屎經常都是撒在我的頭上？
莫非真是臭味相投，不能自拔？
大肚婆經常要同Ｄ麻煩到震的屎事糾纏，好慘呀！！
好耐都無試過六點收工走人了！！

相識十周年紀念

2006-09-02T18:55:00.000+08:00

尋日在公司忙著之際，接到剛由大連落機的馬渡肥肥來電，正想收佢線的時候，佢話有件好緊要的事要一定要講：「Carolyn，你知唔知今日係乜野日子？」我當然唔知，亦唔想用個腦諗！

「十年前的今日，我響中大崇基的宿舍第一次見你呀！今日係我地相識十周年紀念日！」

一言驚醒！

十年前的尋日，係International Club為班交換生搞迎新營的頭一天，當天馬渡肥肥一抵步放低行李入房後便整天留在我們身邊吹水，當時佢一句廣東話都唔識講，只能用難聽到痺的日人英語溝通，咪話同佢吹水真係幾吃力的！

老公到宜家仲記得我當日係著件淺藍色的上衣加條長牛仔裙，睇黎佢一黎到香港就巳經鎖定目標，識貨！話咁快就十年了，下一年的紀念日我們更有Takumi-chan陪伴，真好！:D