勝在有心人

今晚睇無線個節目，邀請了一對有自閉症兒子的父母分享經驗，聽下聽下，發現生小朋友真係一件要心思熟慮的事情。

雖然我成日話要生個Haruka出黎，但一想到如果小朋友大吉利是有甚麼問題時點算...想到這𥚃，往往會冒出不生罷了的念頭，反正我同老公都好鍾意過二人世界。

不過我相信神在每一個人的身上都會有不同的安排，作為渺少的人，我們應該順著衪的旨意而行，不要為未知的將來憂慮，因為衪必看顧我們。

栽培

前幾個月睇黎明concert換來一點失望，因為同佢一貫的製作認真不同，沒有驚喜，呢句說話出自一個超級fans口中是十分大件事的。

但近來買Janice, Charles同Songs of Paintings的CD，入面分別收錄佢地同光良響Leon的concert的片段，我就認為Leon之前開concert是要栽培新人，俾佢地唱紅館的經驗。真係好老闆！！

笑我傻？哈哈，忠心fans係嫁勒！！死未？？！！

酸溜溜

各位都知我由中一巳經開始鍾意Leon，咁多年都無變過心啦！

近日佢同樂基兒段戀情炒得熱烘烘，我信係事實嚟嫁。都好，終於同果個核突豬皮劃清界線，而呢個model亦有型有格，敢做敢認，同Leon好襯。但都不明白點解硬係有Ｄ妒忌...

死囉，差不多成三十歲人，仲有咁嘅心態...而且我仲要係結咗婚成五年啦...點算??!!

畢業全家幅

花費了近兩千元，換來家人的高興，都算值得。為了更超值，公諸同好，見下：

http://pg.photos.yahoo.com/ph/carolynwong/my_photos

情義我心知

Leon今年力作，情義我心知，萬眾期待，不容錯過！！！

http://www.moonlightintokyo.com/

返工的幸福

原來每一日返工不用提心吊膽的感覺是這麼的好，回想起之前的一年半，每一天上班都令人坐立不安，不知道幾時會俾阿姐話。當然真係做錯事就死有餘辜，但事實係經常都係死得不明不白，令人洩氣不巳。

現在每一日返工都係一件樂事，雖然工作係無聊些少，但換來的安全感覺真係好正！（除咗逢星期二晚經過碌波場都會好擔心之外，死未？魔爪居然仲不斷向外伸展...好得人驚！！）

感謝世貿

因為世貿會議，銅鑼灣變得特別安全，任何時間都有大批警察全天候巡邏保護市民；
因為世貿會議，朝早的交通變得異常順暢，交易廣場對出的小隧道無塞無阻；
因為世貿會議，平日總是擠滿自由人的祟光地下化粧櫃位回復正常；
因為世貿會議，每一天看新聞都變得有謂...

Thank you WTO-MC6!!!

做到癲

擒日凌晨一點收工，一點半回到家，今晚十二點收工，十二點半返到屋企，人都癲，希望快Ｄ跑完馬，下星期準時收工！！！！！！！

我愛暖爐

我老公生理結構有一樣好正的地方，就係無論天氣幾凍，個身都會發熱，所以我叫佢做Heater仔，佢都好鐘意呢個名。

今晚好死凍，所以一面坐響佢度，一面打呢篇文章，好溫暖，我愛我的私人暖爐！！！

新工作

返新工巳經五天，各位或者會奇怪點解我呢排無寫新文章，因為真係好多野做...報告一下先！

上星期三last day後同班好同事去食飯，城大城軒平靚正，無得頂，仲收到朋友仔送的Agnes B卡片袋，開心！之後一日上機同個朋友展開為期四日的東京購物團，日日由朝早行到晚，癲咗！盡慶後今個星期一返新工，因為好快會有餐大茶飯開，所以第一個星期巳經要做到較遲先收工。

呢幾日經歷到大機構的根本性問題，太多部門做一件事，分工太細緻,加上其他部門的不合作，搞到做一個容易到當生菜咁食的事複雜化，duplicate effort，同埋浪費人力物力...無所謂啦，鬼叫我向錢看，同埋要由昂船洲返回銅鑼灣咩，好快習慣啫，畢竟我都係由大機構麻煩環境中培育出嚟的麻煩人！！！

十年樹木

擒日同同事傾偈，講開同老公原來識咗成十年。我哋係響1995年我入U的時候識的，當時上庄做International Club的Promotion Officer，個會負責接待班交換生，幫佢哋搞活動融入香港，我老公就係響1996年9月入中大的交換生，記得佢一嚟到宿舍已經成日落地下同我哋講東講西，好煩。之後就日日打電話俾我，同埋聯同其他交換生嚟我宿舍食飯，我鑊鑊都只係腸仔雞翼，搞笑。

之後追逐咗半年終於拍拖，但地下情咗三個月後佢就要返日本，果時都唔知點算，這亦是發展地下情的原因，當時連我roomate同庄友都唔知的...

之後的發展，留待下回分解，打到好倦...

電車男

上星期睇完電車男的電視剧，電腦網絡真的很神奇，甚麼事也可以發生。身邊有好幾對的夫婦聽說也是透過Internet認識，拍拖及結婚的。回想過來，我同我老公也是於分隔兩地的時間透過Internet維繫的。

在分開四年的時間，我們除了隔幾個月會飛一次見面外，每日除寫信外，亦會用當時流行的MS Comic Chat來傾偈，而每晚都會傾一陣電話。如果當時沒有電腦及Internet，應該我現在都不會叫做馬渡太太。

科技進步，造就了許多經典的愛情故事，曾經想過用我們的經歷寫一本書紀念，但總提不起勁，突然想在Haruka出世前完成呢個心願，送俾我個女做出世禮物...哈哈，但其實佢幾時出世我也未知...

女人最痛

同親戚每月一聚的日子居然提早，痛到我癲，加埋冷親作感冒，個頭痛到爆，果真女人最痛square2，做乜都無心機，包括寫日記，就此拜別!!!

孤枕難眠

冷冰冰的夜晚，無法入眠，因為我個御用暖爐出Trip，星期日先返。平時瞓覺會嫌佢又肥又熱，今晚凍冰冰時就好鬼想有佢響隔離取暖。好凍呀！！

男人是否都一樣？

今晚同同事食飯，傾了好多話題，其中一點就係男女關係，因為涉及私隱，不會在此公開。但不禁令我想起葉玉卿首歌，如題。慶幸我揀到一個Ｏ吾會管我(除咗用錢)的老公，但其實佢是否與其他男人都一樣？

================

男人是否都一樣

男人是否都一樣，偷窺眼光時刻四處望，人前人後例必稱好漢，一天到黑有過分聯想。男人是否都一樣，口中說的和真相兩樣，綿綿情話越講越簡潔，謊話廢話卻越說越長。無聊就想最好你親他一趟，醉酒失意要陪幾多個晚上，然後若找到心中新的方向，會說你怎麼將他綁。然而要說說，我未曾絕望，然而實在，怕再入情場，傾盡真心，傾不盡苦況，誰願再一次受傷。男人是否都一樣，不應對他存深厚寄望，誰能明白內心極深處，很需要一個夢𥚃情郎。男人是否都一樣，喜歡女人純真又放蕩，為博歡心什麼都應允，得到了一切就會淡忘。

去旅行了！

今日老公幫我去旅行社交錢取機票，下星期四去旅行了，去邊？當然係返日本，今次係去東京，因為大阪好貴。

去東京當然會大出血，今次第一日仲會去有我至愛的Agnes B的Factory Outlet，希望不會第一日就洗晒Ｄ旅費，應該不會吧... -_-"

今次真係攞命之旅，11月23日last day，24日一早上機，27日深夜落機，28日一早返新工，人都癲，不過次次轉工都係咁，都慣了！！

如何做個好老闆

入咗呢間公司，除了識到一班好朋友外，最重要就係學識一樣野，就係點樣做個好老闆。

各位咪以為我部門有個好榜樣俾我去學習，教材係有，但活脫脫是一個反面教材。部門阿姐係一個不只公司裏面出名的辣椒，響呢行都響負盛名，出名麻煩惡頂，之前在巴士公司時經巳聽過，記住，果時係2000年，呢間公司只係啱啱開...

我一向覺得出黎做野最緊要係人際關係同埋氣氛，呢位自以為好掂的大姐就相反，硬要班同事谷住度氣，邊個會有興趣幫你做好Ｄ野呀？無錯，每個人都會用放大鏡睇他人的缺點錯失，用叮噹支縮小槍對自己的問題，但相信一個心理正常有點良知的，都會響夜闌人靜時反省一下自己。點解呢幾年來同事無一個做得長？可能真係我地的質素有問題，但你自己又有無問題呀？個個走時都要不歡而散，自己又好過咩？山水有相逢，萬一你宜家條靚第日做你老闆時你又點過？呢行好細的，風吹得快過龍捲風！！

感謝我有機會在這間公司做，令我學識如何不做個乞人憎的老闆，所有佢做過講過的事只要不做就成了！

馬騮仔，咪鬼同佢激氣啦，下星期我要派去守沙頭角，自己小心啦！！！

龍年真係當旺

繼考到車同轉新工後，今日又完成一個心願，就係終於畢業了！

識我的朋友都會知，我係一個不折不扣的懶人，凡事都不會搏盡，所以讀呢個碩士學位都係得過且過，無乜俾心機。但又有乜所謂？過到海就係神仙啦...是否覺得我好不負責任呢，哈哈！

今年旺龍年，身邊的龍年朋友傳來一個又一個好消息，識了十年的老闆朋友成功追到個佢覺得好正的女仔，好同事終於可以脫離火坑，中學開始玩埋一齊的好朋友筧得如意郎君，怕且快拉埋天窗，有大學同學年頭一索得男，真係個個都好！！！正！！！

明年犯太歲，一定要謹慎行事，但製作Haruka係頭項任務！！！！

義工不易當

舊同事的志願機構舉辦一個名為Company Programme的活動，主要來說是教一班中學同學仔開設一間公司，投入運作生產，賣股集資，清盤結業，令佢地體驗一下商業世界的運作。

今日班同學仔傾到做Business Plan，都算OK，起碼有心機做，不過係要俾多D Guidelines。過程中除了令佢地學野外，其實自己亦學到不少，有益有意義！！但每個星期要特登入元朗，同埋做好多準備功夫，都覺得有點吃力！！

考到牌了！！！

經過多個月的努力，終於考到車牌了！上次考中期因為大意，又練得不夠熟練，加上落雨落到巴巴聲，所以要考多次先過關。但塞翁失馬，焉之非福，因為要補鐘先至可以再考，所以迫住學多幾個鐘。但好好彩遇到位好正嘅阿sir，提點了許多之前無人話我知的事同竅門，再考中期當然無問題順利通過啦！

之後出路面，當然搵返呢位師傅同埋請佢介紹幾位好師傅啦！因為跟著呢幾位好師傅，所以一路的進度都好好，無乜問題。最後今日考到車牌，準備寫張卡多謝佢地。

知道考到果一刻，真係好好好開心！！！

多謝好友

做咁多份工，最自豪最開心的事並非可以完成一Ｄ偉大的創舉，或者有機會升職加薪，而係響過去的咁多份工中，可以認識到一班好好好好好....的朋友。

在第一份酒店工，因為剛剛畢業，公司𥚃面差不多最細，成為眾人的小妹妹；第二份巴士工入面，認識到幾位志趣相投的姐仔，同埋教識我做ＰＲ，最緊要識講衰野同粗口；第三份電器工，認識到一位真正欣賞我，錫我的姐姐，仲係一位會想我去幫佢手的老闆；第四份，保赤安良，響無三年但有八個月的非人生活中，幾位好好玩的朋友成為每日返工的支柱，離開果度我完全無任何留戀，但真係好鬼掛住佢地，到宜家都會諗返以前Ｄ攪笑事。即將離開的呢份工，其實最掛住的，又係一班朋友仔，以前曾經有好幾次都想走，但諗起可以同一班好ＦＲＩＥＮＤ的同事玩，暫時將決定緩期執行，直到呢一刻先ＴＡＫＥ ＡＣＴＩＯＮ，你哋將會成為我生命入面佔有重要位置的一班！

擒日各位好友賞面黎學校同我影畢業相，真係令人感動，我老公仔又不怕辛苦幫我做機佬（雖然佢講明要食我Ｄ Godiva朱古力），所以我今日一定要以筆代口，將我至深的感謝抒發出來，同埋亦都明白我係一個幾咁幸福的人！！

畢業相

明天約了班同學一齊影畢業相，既然特別返去，亦順道約了同事和ＦＲＩＥＮＤ去浸會影相。有個舊同事好好人，問要不要買紥花或者公仔，哈哈，傻豬黎㗎，本小姐年紀不少了，仲邊樹有童真嗱住紥花四圍走，著件袍好ＰＲＯ咁影張相就得了！！

在此亦特別多謝各位好友答應抽時間出席，我真係真係好開心的！！！！明天要影靚相！！！

辭職了！

今日終於遞信了！感覺真爽！！

由返到公司開始做到無停手，到差不多收工時仍在努力地作文，又要分身去睇新聞，忙到兩頭騰。但今日機不可失，一定要遞信，如果不做就要等到星期一，咪攪！同老闆交帶完所有手頭功課後便送上信封一個，好彩佢都趕住走，不是圍我好耐，好彩好彩！！

新開始了！！

派彩了！！

今日收到新公司人事部打電話黎壓價，當然恃住有後台的我不會就犯，下晝再打黎問我最快幾時可以去ＢＯＤＹＣＨＥＣＫ，我話星期三，（我呢幾日不便，當然無講）算係巳經收到ＯＦＦＥＲ，還欠未簽約啫！

開始惆悵點樣遞信，不想被老闆鬧，不想被老闆鵝，快Ｄ得到解脫就好了！！

燒烤樂

朝早去個筆試，因為心知大局巳定，所以不是太緊張，但希望個ＴＥＳＴ都可以好好睇睇啦！之後同老公響銅鑼灣蹓躂，花咗４０蚊入去睇維園個日本祭，無野睇，真失望！！

今晚同班同事去大埔大尾篤燒野食，每人只係６０蚊，就巳經有成盆燒極都燒不完的肉同丸，正！加埋今晚極大風，燒完都無成身臭，真好！佢地燒完再去Ｋ，但因為老公下令不想去，唯有聽話跟佢返屋企，一晚咁多啦！！

轉多幾份工都係罪咩？

各位，六年轉五份工都Ｏ吾係好過份啫！點解每次去見工都離不開呢條問題？

作為見工天后的我，當然預備好晒答案，令到講嘅順暢，聽嘅舒服，但真係答到好悶嘞！

呢個世界點解要有咁多不同的機構公司？因為個市場大囉！市場定律，demand & supply，有market value就會有人收留啦！點解我轉咁多份工又叫我嚟面試？我的答案會同你一樣囉！

如果叫我去見工的公司會花心思問Ｄ刁鑽Ｄ嘅問題的話，見工遊戲一定更加好玩。你哋都知我係有鋪見工癮嫁呵！

時候到了

時間應該就快到了！經常擔心夥伴有可能因我的決定受影響而錯失了許多機會。但相信大家都係時候了！
馬騮仔，俾心機！:D

柳暗花明又一村

醞釀了好耐的一件事終於慢慢出現出口，雖然宜家未完全成事費事講到好清楚，但應該係一件對我對我將來個ＨＡＲUKA都會係一件好嘅事黎。收到佳音先至post出嚟。

今日睇電視ＬＥＯＮ又有新碟，雖然係環球趁火打刧的一張碟，但作為忠實ＦＡＮＳ，當然不會錯過！

讀完個ＭＡＳＴＥＲ以後的呢幾個月有Ｄ失落，好似無乜寄托，要快Ｄ搵Ｄ野讀申請埋個持續進修基金，咪蝕咗交咗Ｄ稅！！

學神記

今日都要去學車，場地係葵盛圍。如果考過葵盛圍的都會知道果度一共有三條路線，試場左轉，右轉及石頭街。根據師傅講，九成九都會考右線，因為響呢條線可以考晒大部份題目，包括路口判斷，轉波落斜，爬頭轉線，同埋路口轉出轉入。所以我上堂都會主攻右線。

今日係第１０堂，所以師傅同我做個模擬考試。當然因為無考試壓力，順利通過。但揸車最忌係自信過頭，所以我都會採取穩打穩紥態度，滋油淡定行車，希望１１月頭的考試可以順利過關啦！

但...考到又如何？老公怕我會撞死，講明Ｏ吾俾我買車...生肉Ｏ吾生膽，激死我！！！

又係忙碌的一天

今日雖然係星期日，但行程比平時更多更忙。首先要去荃灣拜山，然後又要去葵興學車，學完要返觀塘外家食飯，睇怕要十一點過後才可回家。

Apple推出New iPod，但完全無意欲購買，因為其實無乜新驚喜。我最鐘意我部iPod Shuffle，無論外型同設計真係無敵，我成部機都係Leon的歌，根本無需要display。老公就有部藍色iPod Mini，佢話容量好夠了。

趕住出門口

要去元朗了，上星期遲到，俾個ＦＲＩＥＮＤ怒吼，好驚！
今日一定有早無遲！！！

無驚無險又一天

今日如常返工放工，無乜特別事發生。

聽日行程十分緊湊，先要一早入元朗同班學生仔開會，因為我參加了一個朋友的機構的義工活動，教佢地做生意，但其實我都係烏下烏下，哈哈。之後要趕去學車，成兩個鐘。然後要趕去中環搭船入長洲參加一個阿伯聚會，真慘！真係不明白只係得到個ＭＨ，有乜咁威？

睇黎聽日好夜先返到屋企ＬU。

傳ＬＥＯＮ同ＣＨＡＲＬＩＥ拍拖，係真就好了，希望佢同豬皮永遠都不用連在一起，好憎豬皮。

第一篇Blog

雖然知道Blog的存在好耐，但總提不起勁去做個屬於自己的Blog。原因？懶之過。

既然係第一篇，循例都要做個自我介紹：

香港女仔，嫁咗個日本仔，想生個Ｂ仔，但又怕宜家間公司環境核突得滯，希望可以早日無咁運滯，轉份好工威一劑

今日照常返工放工，夜晚同兩個一排無見的舊同事食飯，天南地北，亂吹一通。回家等睇大奧，因為套戲的日文敬語好好聽，其他人覺得麻麻，但我又睇得好開心喎！

返埋聽日又放假，真好！！！